حكايه شروق
صلاح اول ما شافها كدة قلبه وجعه، ونجلاء خدتها في حضنها وقعدت تعيط معاها، شروق قعدت تحكيلهم انها بقالها خمس سنين مستحملة المهانة عشان المركب تمشي وفي الاخر اترمت من غير ولا جنيه ولا حتى هدومها، صلاح قالها ولا يهمك يا بنتي بيت ابوكي مفتوحلك طول العمر، ونورهان لما عرفت جت جري عليها وقالت لها بصي بقى احنا مش هنقعد نعيط، اللي فات مات، قومي اغسلي وشك كدة وتعالي نفكر هنعمل ايه.
شروق قعدت اسبوعين في اوضتها مش بتاكل ولا بتشرب، لحد ما في يوم نجلاء كانت عاملة محشي وملوخية وفراخ محمرة، وريحته كانت قالبة البيت، شروق قامت كلت وقالت الله يا ماما تسلم ايدك، الاكل ده يجنن، حاتم قالها بضحك طول عمرك اكلك انتي اللي يجنن يا شروق، فاكرة لما كنتي بتعمليلنا كشري وطاجن لحمة واحنا صغيرين، نورهان كانت قاعدة وقالت والله فكرة، يا شروق ما تفتحي مشروع اكل بيتي، انتي نفسك في الاكل حلو اوي، وكل الناس كانت بتحلف بطبيخك.
شروق في الاول قالت لا انا ماليش نفس، بس نورهان مسكت موبايلها وصورت حلة المحشي اللي نجلاء عاملاها وقالت لها لو ده اكل امك يبقى اكلك انتي هيبقى عامل ازاي، وفعلا فتحت لها صفحة على فيسبوك سمتها أكل شروق البيتي، وكتبت اول بوست، احلى اكل بيتي نضيف بايد ست مصرية اصيلة، التوصيل لأي مكان، واللي عايز يجرب اول اوردر عليه خصم.
اول يوم مفيش حد طلب، تاني يوم واحدة ست كلمتها قالت لها عايزة صنية مكرونة بشاميل، شروق قامت من النجمة عملتها بضمير وبعتتها مع حاتم، الست داقت وكلمتها قالت لها ايه الجمال ده تسلم ايدك، ومن ساعتها الدنيا ولعت، الست دي كتبت بوست على جروب ستات المنطقة كلها تشكر في شروق، والبوست جاب متين كومنت، كلهم عايزين المنيو.
شروق بقت تصحى من الفجر تنزل السوق مع أبوها صلاح، تجيب الخضار طازة والفراخ مدبوحة قدامها واللحمة من الجزار اللي يعرفه أبوها، وترجع تقف في المطبخ مع أمها نجلاء، نجلاء كانت بتساعدها وتقولها يا بت براحة على نفسك، وهي تقولها لا يا ماما ده رزق وجايلي، ونورهان بقت هي اللي ماسكة الصفحة والردود والتصوير، كانت بتصور الاكل بطريقة تخلي الواحد ريقه يجري، وحاتم بعد شغله كان بياخد الموتوسيكل بتاعه يلف يوزع الاوردرات.
