حكايه شروق
في خلال تلات شهور بس الصفحة بقت فيها عشرين الف متابع، وكل يوم عندها بالميت عشرين تلاتين اوردر، بقت بتعمل وجبات للموظفين، وعزومات، وصواني عقيقة وسبوع، وربنا فتحها عليها من وسع، وجابت تلاجة كبيرة وديب فريزر وبقت بتشغل بنتين معاها يساعدوها في المطبخ، وبقى عندها مرتب اخر الشهر بتدفع ايجار اوضتها لأبوها رغم انه رافض، وبتدي لأمها وبتحوش.
وفي يوم وهي قاعدة بتقفل الحسابات لقت رقم غريب بيتصل بيها، الو مين، قالها انتي شروق، قالتله ايوة مين معايا، قالها انا ماجد، شروق ايدها اترعشت والدم غلي في عروقها، قالها انا عرفت انك بقيتي مشهورة وما شاء الله شغلك حلو، وانا بصراحة الدنيا جت عليا، الشركة مشتني وبقالي فترة قاعد من غير شغل، وعايز اطلب منك طلب، شروق قالتله طلب ايه، قالها شغليني معاكي، شغليني حتى مندوب توصيل بالمكنة بتاعتي، وانا والله هبقى ملتزم واعتبريني واحد غريب.
شروق سكتت ثواني طويلة، افتكرت يوم ما طردها في نص الليل من غير جنيه، وافتكرت ذلها وهي بتستلف تمن المواصلات، وافتكرت وقفتها في المطبخ بتعيط عشان مش عارفة تجيب لنفسها حاجة، وبصت حواليها لقت ابوها صلاح بيبص لها وبيقولها اعملي اللي يريح ضميرك يا بنتي، وامها نجلاء بتقولها اللي تشوفيه يا شروق، ونورهان بعتالها على الواتساب بتقولها اوعي ترجعيه جوزك تاني.
شروق خدت نفس عميق وقالتله بص يا ماجد، انا مش هظلمك زي ما ظلمتني، لو عايز تشتغل مندوب تعالى بكرة الصبح الساعة تسعة، هتاخد مرتبك باليومية زيك زي أي مندوب، ولو اتأخرت على عميل او كلمت حد بطريقة وحشة هتمشي، انا هنا صاحبة الشغل وكلمتي هي اللي هتمشي، فاهم ولا لا.
ماجد اتكسف وقالها فاهم، وجه تاني يوم فعلا، كان لابس نضيف وراكب المكنة، شروق اديته اول اوردر وقالتله ده لعمارة كذا، وحاتم كان واقف وراها بيضحك ويقولها بقينا احنا اللي بنشغل الناس اهو، وماجد بقى يلف طول النهار يوصل الاكل، وشروق بقت هي المعلمة، هي اللي بتحاسب وهي اللي بتقرر وهي اللي ليها كلمة، وكل الستات في الجروب بقو يكتبو قصتها ويقولو شايفين شروق اللي جوزها قالها اقعدي من الشغل، دلوقتي هي اللي مشغلاه عندها مندوب.
وبعد سنة شروق فتحت مطبخ كبير في شقة فاضية تحت بيت أهلها، وسمته مطبخ شروق، وبقت بتعمل اطعام وبقت الناس بتيجي تتصور معاها، وماجد بعد فترة مشي لوحده عشان مقدرش يستحمل انه شغال عند طليقته، وشروق ربنا عوضها بواحد ابن حلال كان بيجي يطلب اوردرات كتير وبيحترم شغلها وقالها انا عايز ست جدعة زيك تبقى شريكة حياتي، وشروق قالتله انا موافقة بس بشرط، شغلي ده خط احمر، محدش هيقولي اقعدي من الشغل تاني، قالها شغلك ده تاج على راسك وانا هساعدك تكبريه.
