بقلم روماني مكرم 2

أبويا نزل من التاكسي وصوته زلزل الشارع:

– “أنتِ بتعملي إيه يا فاجرة هنا؟! وبأي حق بتكسري باب شقة ابني المرحوم؟!”

عبير أول ما شافتنا، ابتسمت ابتسامة شر ووقفت بكل بجاحة، وحطت إيدها في وسطها وقالت بصوت عالي عشان تسمّع الشارع كله:

– “أهلاً يا حمايا السابق!.. بكسر باب شقتي وحلالي وحلال ابني اللي في بطني!”

الكلمة نزل على دماغنا زي الصاعقة!

أنا وأبويا اتصدمنا وصوتنا اتقطع: “ابنك اللي في بطنك؟!”

عبير ضحكت بقهقهة مستفزة، وطلعت من شنطتها ورقة، ولوحت بيها قدام وش أبويا:

– “أيوه! أنا حامل في الشهر التاني من المرحوم سيد الله يرحمه! والتقرير الطبي أهو ومختوم من المستشفى! والشقة دي شقة زوجية، ومن حقي أخد عفشي ومؤخري وحق ابني اللي جاية أربيه بعيد عن قسوتكم وغلكم!”

أنا اتجننت وقربت منها وصايحة في وشها:

– “حامل؟! حامل إزاي وأنتِ من يوم وفاة سيد وأنتِ بتقولي إنك مش حاسة بحاجة وإن الدورة مقطوعة عنك من القهرة؟ أنتِ كدابة وسارقة وملعونة!”

عبير بصتلي بقرف وقالت بكل برود:

– “التقرير ما بيكدبش يا حلوة.. وتسألي جوزك.. قصدي ‘عصام’ اللي واقف جنبك دا، هو اللي أخدني بنفسه للمستشفى وصور التقرير وشهد على التحاليل!”

بصيت لـ عصام.. الراجل اللي كنت فاكراه زوج وسند، لقيته موطي راسه في الأرض مش قادر يحط عينه في عيني. زعقت فيه بصوت شق الشارع:

– “أنت يا واطي؟ أنت رايح مع مرات أخويا المستشفى تثبت حملها؟ بتبارك خيانتك وخيانتها بروح طفل جديد؟ ولا دي لعبة جديدة من ألاعيبكم القذرة عشان تاخدوا الشقة والعفش؟!”

عصام اتلعثم وقال بصوت واطي ومكسور:

– “يا سمر.. أنا.. أنا عبير كلمتني وقالتلي إنها حاسة بتعب وخايفة، وأنا أخدتها المستشفى بصفتي ولي أمرها بعد سيد.. والتقرير طلع صح، هي حامل، وأنا بقف مع الحق!”

أبويا مسك عصام من طوق قميصه وعصره:

– “حق إيه يا خاين يا ابن الخاين؟ الحق إنك تكسر باب شقة صاحبك وأخوك؟ الحق إنك تساعد ست خاينة تنهب شقة ابن عمك؟ أنت مش راجل، أنت جزمة في إيدين العقربة دي!”

في اللحظة دي، دخل المحامي بتاعنا، عمي عبد المجيد، ومعه اثنين من رجال الشرطة (أمين شرطة وظابط الدورية) اللي كان طلبهم عمي لما شاف المهزلة.

عمي عبد المجيد قرب بثبات ورفع إيده وقال للظابط:

– “يا فندم.. الست دي بتقتحم شقة متوفي بدون إذن نيابة ولا إعلام وراثة، ومعاها غريب بيساعدها في سرقة محتويات الشقة. والورقة اللي معاها دي تقرير طبي أولية ما تديهاش الحق في كسر الباب وتفريغ الشقة قبل ما النيابة تحقق وتعمل إعلام وراثة رسمي!”