عروسة جديده 4
قاسم بص له بعينين حمرا من كتر الدموع: “حاجة إيه تاني؟ هو لسه في مصايب؟”.
الضابط طلع الفلاشة اللي كان المحامي مشغلها من شوية، وقال: “أحمد قال في الفيديو إنه مشفر ملفات تانية على تليفونه، وبما إننا لقينا الورقة، فالمحامي الفني بتاعنا قدر يفك تشفير باقي الفيديو اللي قطع.. أحمد مكنش تعبان بس في الفيديو.. أحمد كمل كلام، والنيابة لسه بعتالي تفريغ الجزء الأخير من دقيقة واحدة”.
قاسم اتنفض من على السرير: “قال إيه؟ أنطق يا فندم!”.
الضابط قرا من الشاشة: “(يا قاسم.. لو الورقة دي وقعت في إيدك وعرفت سر أمي.. ف لازم تعرف إن أمي كدابة.. هي فهمتني إنك ابن صلاح المنشاوي عشان تخليني أكرهك وأوافق أأذيك في نهى.. بس أنا قبل ما أموت، دخلت أوضتها وسرقت ورق الجواز العرفي القديم بتاعها.. أمي مكانتش متجوزة صلاح المنشاوي.. أمي كانت متجوزة واحد تاني خالص اسمه صلاح برضه، بس صلاح…)”
وفجأة، الباب اتقفل بعنف ودخل الدكتور اللي كان بيشرف على عملية نهى، وشه كان أصفر زي الليمونة، وهدومه عليها آثار دم..
بص لقاسم وقال بصوت بيترعش: “استاذ قاسم.. إحنا وقفنا النزيف بالعافية.. بس الجنين… الجنين لازم تشوفه بنفسك في كبسولة الملاحظة.. دي مش طفرة، ودي مش حالة طبيعية.. إحنا سحبنا عينة DNA فوراً عشان نحدد الهوية الجينية للطفل ده، لأن الملامح اللي بدأت تظهر عليه في السونار الرباعي دلوقتي… مش ملامح بشرية طبيعية!”.
قاسم وقف مكانه مذهول، والضابط تليفونه رن في نفس اللحظة.. رد الضابط، ووشه اتخطف وهو بيسمع العسكري على الخط التاني بيقول: “يا فندم.. وصلنا بيت صلاح المنشاوي أبو المدام نهى.. لقيناه مشنوق في صالة بيته، وجنبه رسالة مكتوبة بدمه!”.
الضابط وقف متسمر في مكانه، التليفون كان هيقع من إيده، وعينيه بتتحرك في الأوضة برعب حقيقي وكأنه بيحاول يربط الخيوط اللي بتتقطع كل ثانية.
قاسم صرخ فيه وهو بيمسكه من كتافه: “الرسالة مكتوب فيها إيه؟ أنطق يا فندم! عم صلاح مات مشنوق؟!”
الضابط بلع ريقه وبص لقاسم بنظرة كلها غموض وقال: “العسكري بيقول إن الرسالة كلمة واحدة بس ومكتوبة بالدم على الحيطة.. مكتوب: (اللعنة حلت بالكل.. والسر في المصحف)”.
المحامي ضرب كف على كف وبص لقاسم: “المصحف! المصحف الصغير اللي أحمد سابه لنهى قبل ما يموت وقالها يباركلك في جوازك! المصحف ده مع مين دلوقتي؟”.
