عروسة جديده 4
المحامي صرخ بذهول: “يا نهار أسود! يعني قاسم ونهى.. إخوات من الأب؟!”.
الدكتور أخد خطوة لورا وهو بيبص للأشعة اللي في إيده وركبه بتخبط في بعضها: “مش ممكن.. لو الكلام ده صح.. يبقى الجنين اللي في بطن مدام نهى مش طفرة جينية عادية! التشوه والنمو المتسارع ده نتيجة.. زواج محارم!”.
فايزة بدأت تضحك وتصرخ بجنون: “شربتوا من نفس الكاس! ضيعتوا ابني أحمد وعايزين تاخدوا فلوسه؟ أهو ابنكم هيتولد مسخ.. مسخ ملوش ملامح ويموت في أول يوم! انتقام ربنا جه يا قاسم.. يا ابن صلاح المنشاوي!”.
قاسم مبقاش سامع حاجة، وبص لنهى بنظرة مكسورة، نظرة وداع وخوف وضياع، وفجأة وقع على الأرض مغمى عليه، والدموع لسه منشفتش من على خدوده.
وفي نفس اللحظة، نهى حست بوجع شديد تاني في بطنها، وجع أقوى من الأول بكتير، والنزيف بدأ يرجع تاني بغزارة.. والدكتور صرخ: “بسرعة.. جهزوا أوضة العمليات.. المريضة بتنزف والجنين في خطر!”.
السرير كان بيتحرك بسرعة جنونية في طرقة المستشفى، الممرضات بيجروا وحواليهم دكاترة التخدير، وصوت كعب السرير وهو بيخبط في الحيطان كان بيعمل صدى مرعب في ودن نهى. هي مش سامعة غير صوت ضربات قلبها، والرؤية بدأت تشوش قدامها.. صورت قاسم وهو واقع على الأرض، وصوت الكلمة البشعة “إخوات” كان بيلف في عقلها زي الإعصار.
دخلوا بيها أوضة العمليات، الإضاءة البيضاء الشديدة عمت عينيها، ودكتور التخدير قرب منها وهو بيقول بنبرة سريعة: “خدي نفس عميق يا مدام نهى.. اهدئي خالص”.
نهى مسكت في بالطو الدكتور وهي بتعيط بهستيريا وتصرخ: “ابني يا دكتور.. نزلوا ابني.. أنا مش عايزة مسخ.. مش عايزة ابن حرام!”
الدكتور بص للممرضة بنظرة قلق وقال: “المريضة دخلت في صدمة عصبية حادة، المؤشرات الحيوية بتقع، نيميها بسرعة!”
في نفس الوقت برة الأوضة، قاسم بدأ يفوق في أوضة تانية، لقى المحامي وضابط المباحث واقفين فوق رأسه. قاسم قعد على السرير بذهول، حط إيديه على رأسه وبدأ يصرخ بصوت شرخ جدران المستشفى: “لأ.. لأ يا رب! أنا ونهى؟ نهى اللي حبيتها وصنتها تطلع أختي؟ طب إزاي؟ عم صلاح المنشاوي أبوها؟ أنا مش فاهم حاجة.. أمي دي إيه؟ شيطان؟!”.
الضابط قرب منه وحط إيده على كتفه بهدوء حذر: “استاذ قاسم.. اهدى عشان نعرف نتصرف.. الكلام اللي في الورقة ده اعتراف من أحمد، بس إحنا لازم نتأكد. أنا كلمت النيابة فوراً، وفي قوة اتقطعت دلوقتي ورايحة على بيت صلاح المنشاوي أبو نهى عشان يجي يمثل للتحقيق.. وفي حاجة تانية لازم تعرفها”.
