اخت جوزي سرقتني ج 2
إنتِ مكانش عندك علم بالحوار دا؟
علم بإيه وبتاع إيه؟ طارق كان خلاص هينفجر من العصبية. مش الغويشة دي دهب جهازك اللي مامتك جابتهولك؟ أنا فاكر كويس إن أختي وقتها نزلت صورتها على صفحتها وكتبت تتباهى بيكِ قدام الناس. هي مالها دلوقتي؟ عايزة إيه بالظبط؟
لما سمعته بيتكلم كدة ومش مشترك معاهم في اللعبة، حسيت بحمل اتشال من على صدري وهديت شوية.
مامتك لسه مكلماني، وبتقولي هاتي الغويشة عشان نلحق أختك، وبتقول إن القرار قرارك إنتَ.
طارق ضحك بسخرية وغل
حاجة مش بتاعتي أصلاً هقرر فيها بصفتي إيه؟
طب لو كانت بتاعتك، كنت هتقرر وتديهالهم؟
شرح كلامه بسرعة
أكيد لأ طبعاً! أنا مش قصدي كدة. كل حاجة في بيتنا إنتِ صاحبة القرار الأول والأخير فيها. لو عايزة تساعدي ساعدي، أنا معاكِ وفي ضهرك واللي تقوليه هيمشي.
سكتت لثواني.
طب وإنتَ شايف الموضوع دا إزاي؟
هكون شايفه إزاي يعني؟ دا دهب جهازك وشقا أهلك، ومحدش له الحق يمد إيده عليه أو يلمسه. موضوع أمي دا سيبيه عليا، أنا اللي هروح أتكلم معاها
وأوقفها عند حدها. إنتِ ما تشغليش بالك خالص.
في اليوم التالي، طارق عمل اللي وعدني بيه. اتصل بأمه وأخته وواجههم بوضوح، بس طبعاً صفاء منشفتش دماغها بسهولة، وفضلت تعيط وتقول لقرائبها إن طارق واقع تحت تأثيري وإني مِقوِّياه على أهله.
الجروب مِهديش، والتلقيح كان عمال يزيد. عشان كده قررت أقطع عِرق وأسيّح دم، وعزمت العيلة كلها عندي في البيت يوم الجمعة بحجة إننا نتصافى ونحل سوء التفاهم ده قعدة رجالة وأصول.
الهدوء الذي يسبق العاصفة
يوم الجمعة، البيت كان مليان. طنط جمالات، عمتو نادية، منى بنت عمهم، وحتى عمو محمود اللي مش بيسيب قعدته جه عشان يشهد رد الحقوق. طبعاً صفاء دخلت البيت وهي شاردة ولابسة وش المظلومة، وحماتي كانت قاعدة عينيها بتبص لي بنظرات عتاب ملوية.
بعد ما ضيفتهم وشربوا الشاي، عمو محمود اتنحنح وقال بصوت جهوري
يا جماعة، إحنا اتجمعنا هنا عشان نصلح النفوس. يا رانيا يا بنتي، الأصول أصول، والدهب ده طالما سلف من صفاء، لازم
يرجع عشان الواد يتجوز.
أنا ابتسمت بكل برود، وبصيت لصفاء اللي كانت منزلة عينيها الأرض وبتتمسكن
يا عمو محمود، على عيني ورأسي الأصول. بس أنا جمعتكم هنا عشان الأصول برضه، وعشان كل واحد ياخد حقه بالمليم.
