بقلم اماني السيد 3

إلهام بصتله بصلابة وقالتله:

ـ فريدة غبية مش ذكية زي ما إنت فاكر، طالما ساومتنا على شقة العيلة والورث، يبقى هي لسه مخدتش الفلوس من حد، ومحتاجة التنازل ده رسمي عشان تهرب بيه برة البلد. فوق يا معتز وامسح دموعك دي، فادي.. كلم المحامي بتاعنا خليه يصحى ويجيلنا هنا حالاً.

فادي هز راسه بسرعة وطلع تليفونه يكلم المحامي، ومعتز قعد على الكرسي وحاطط راسه بين إيديه، مش قادر يبص في عين إلهام اللي هانها وقدّم بنت عمه عليها، ودلوقتي هي الوحيدة اللي واقفة في ضهره.

بعد نص ساعة، وصل الأستاذ عصام المحامي، وشاف شكل معتز والتوتر اللي في الشقة. قعد وسمع القصة كاملة من فادي وإلهام، ولما خلصوا، المحامي سكت شوية وهو بيفكر وبعدين قال:

ـ الموقف قانونياً صعب لإن التوقيع صحيح، بس عندنا ثغرة.. فريدة كلمتكم وساومتكم على الشقة والورث مقابل الشيكات، والمكالمة دي لو مسجلة أو لو قدرنا نوقعها في الفخ ونخليها تبعت رسائل بالطلب ده، هنرفع عليها قضية ابتزاز وسرقة شيكات بالاكراه وخيانة أمانة، وده هيوقف تنفيذ الشيكات مؤقتاً لحد ما التحقيق يخلص.

إلهام عينيها لمعت وقالت:

ـ فريدة مش هتبطل كلم، هي طماعة وهتتصل تاني عشان تشوف وصلنا لإيه في التنازل. معتز.. إنت اللي هترد عليها المرة الجاية.

معتز رفع راسه بخوف:

ـ أنا؟ هقولها إيه؟ أنا مش قادر أسمع صوتها!

إلهام قربت منه وبصت في عينه بقوة:

ـ هترد وتقولها إنك موافق على كل شروطها، وإنك بتموت من الرعب ومستعد تكتبلها الشقة والورث الصبح، بس بشرط.. تقابلها عشان تستلم الشيكات وتديلها التنازل في نفس الوقت، ولازم المقابلة دي تكون متصورة أو تحت عيون الشرطة.

المحامي ابتسم وقال:

ـ برافو يا مدام إلهام، ده بالظبط اللي كنت هقوله، هنعمل لها كمين “تلبس بالابتزاز”، وبكده نقلب الترابيزة عليها.

فجأة، تليفون فادي رن تاني، وكان نفس الرقم الغريب. إلهام شاورت لمعتز يمسك التليفون، وفتحت مسجل الصوت في تليفونها التاني، وهزت راسها لمعتز عشان يفتح الخط.

معتز فتح الخط وإيده بيموت فيها الرعب، وطلع صوت فريدة الخبيث:

ـ ها يا موزي؟ فكرت ولا لسه عاجبك برود مراتك اللي هتوديك في داهية؟ الشيكات جاهزة تتقدم كمان كام ساعة.

معتز بلع ريقه وحاول يظبط صوته المكسور وقال:

ـ فريدة.. أرجوكي بلاش حبس، أنا وافقت.. وافقت على كل اللي إنتي عايزاه، هتنازل لك عن الشقة والورث وكل حاجة، بس بلاش تدخلي الشيكات النيابة.