ركبت أول تاكسي وقابلتني، وطول الطريق ضربات قلبي كانت سريعة لكن مش من الخوف، دي كانت ضربات الغضب اللي بيبني جدار القوة. الشخص اللي أنا رايحاله ده كان المحامي "رأفت الجبالي"، صاحب بابا الله يرحمه وأكبر محامي أحوال شخصية في البلد، اللي كان باعتلي كذا مرة مع ناس إنه يمسك قضيتي متبرع، لكني وقتها كنت خايفة من تهديدات طليقي إنه يأذي عيالي لو لجأت للقانون بقوة. دخلت مكتبه، وأول ما شافني متبهدلة ودموعي جفت في عيني، وقف من ورا مكتبه مخضوض. المحامي: يا بنتي إيه اللي جرى لك؟ وإيه المنظر ده؟ قعدت قدامه وحكيت له كل اللي حصل، من أول التنازل والإهانات لحد خطة السفر اللي سمعت أخته بتتكلم عنها. المحامي خبط بإيده على المكتب بغضب شديد وهو بيقول: المحامي: سافل ومجرم، وكان بيستغلك عشان يثبت إنك عايشة معاه بمزاجك عشان يسقط حقك في الحضانة! لكن ربنا كشفهم ليكي في الوقت المناسب.. السفر بره البلد بالولاد محتاج موافقة الأم رسمي، أو إنه يعمل قيد عائلي وشهادات ميلاد تانية ويلعب في الأوراق، وده اللي كان بيخطط له. أنا بصيت له بلهفة: أنا: أرجوك يا عمي رأفت، أنا مش عايزة كرامتي بس، أنا عايزة ولادي في حضني، وتحت سقف بيتي، وهو وأهله يدفعوا ثمن كل لحظة ذل عيشتهالي. المحامي ابتسم بثقة ومال عليا: المحامي: من اللحظة دي تقفلي تليفونك تمامًا، ومش هترجعي البيت ده تاني. إحنا هنعمل محضر إثبات حالة فورًا، وبكرة الصبح هتقدم بطلب منع الصغار من السفر في الجوازات، والنهاردة بالليل هتعرفي هيرجعوا لك إزاي وبقوة القانون. في نفس الوقت، في بيت طليقي، الدنيا كانت مقلوبة. طليقي رجع البيت ولقى أمه وأخته وشهم أصفر وبيرتعشوا. هو بزعيق: يعني إيه مشيت؟ وإزاي تسيبوها تخرج؟ أنتوا ضيعتوا من إيدي الكارت اللي كنت هكسر عين أهلها بيه وأسافر بالعيال من غير ما تفتح بقها! أمه ردت برعب: حماتي: البت اتغيرت يا ابني، عينيها كان فيها شرار وقالت كلام يخوف.. دي قالت الكابوس بدأ! أخته كملت وهي بتعيط: أخت طليقي: دي كانت واقفة في المطبخ يا أحمد، تفتكر تكون سمعتني وأنا بتكلم في التليفون؟ قبل ما أحمد يرد، جرس الباب رن بقوة وعنف ورا بعضه. أحمد جرى يفتح الباب وهو متنرفز، وأول ما فتح وسع عينه بصدمة ووشه جاب ميت لون. كان واقف قدام الباب عمي رأفت المحامي، ومعاه اتنين أمناء شرطة، وقوة تنفيذ أحكام ومعاهم قرار عاجل من النيابة بتسليم الصغار مؤقتًا لأمهم لحين الفصل في الق*ضية، بعد تقديم مستندات تثبت محاولة تهريبهم بره البلاد وإجبار الأم تحت التهديد. أحمد صوته اتهز وهو بيقول: هو: إيه ده؟ أنتوا داخلين بيت مين؟ أنا معايا ورق رسمي إنها متنازلة! المحامي دخل بكل هيبة وداس برجليه في الصالة وهو بيقول بصوت زلزل البيت: المحامي: ورقك ده تبله وتشرب ميته يا شاطر.. التنازل اللي تحت الإكراه والتهديد باطل، واللعب في ورق السفر جناية توديك ورا الشمس.. فين الأولاد؟ أحمد وقف مكانه مذهول ومش عارف ينطق، وبص لأمه وأخته اللي كانوا واقفين ورا ظهره بيموتوا من الرعب. أحمد بصوت مرعوب ومتهدج: أولاد إيه اللي تاخدوهم؟ دول أولادي أنا، ومحدش يقدر يمشيهم من هنا! المحامي رأفت الجبالي قرب منه وبص في عينيه بكل قوة: المحامي: كلمة زيادة وهتلاقي نفسك بايت في القسم بتهمة خيانة الأمانة وتزوير أوراق رسمية لمحاولة السفر بالصغار دون علم الحاضنة.. نفذ الأمر يا عسكري. أمناء الشرطة دخلوا جوة البيت من غير ما يستنوا كلمة تانية، وفتحوا أوضة الأولاد. أول ما الولاد شافوا القوة خافوا، لكن المحامي نده عليهم بصوت حنين وطمنهم، وخرجوا معاه برة الشقة. أحمد كان هيتجنن وهو شايف عياله بيتاخدوا منه قدام عينيه، وأمه قعدت على الكنب تلطم وتصرخ: حماتي: يا مصيبتنا السودا! يا فضيحتنا وسط الناس! البت ضحكت علينا وكسرتنا في منطقتنا! في الوقت ده، أنا كنت قاعدة في مكتب عمي رأفت، ضامة إيدي على قلبي وبدعي ربنا بكل جوارحي. فجأة الباب اتفتح، ودخلوا ولادي وهما بيجروا عليا: الولاد: ماما! يا ماما! وقعت على ركبي على الأرض وأخدتهم في حضني، وفضلنا نعيط بحرقة، بس المرة دي دموع فرحة، دموع انتصار. كنت بضمهم لصدري وأنا مش مصدقة إن الكابوس انتهى بالسرعة دي، وإن ربنا نصرني على قسوتهم وظلمهم. عمي رأفت دخل وابتسامة النصر على وشه وقال: المحامي: حمد الله على سلامة أبطالك يا بنتي.. ده مجرد أول قلم خده طليقك، والجايف في الطريق. أنا رفعت راسي وبصيت له وعيني فيها لمعة قوة جديدة: أنا: لسه يا عمي رأفت، حقي وحق ذلي في بيته وكسرة نفسي قدام أمه وأخته لسه مبردتش.. أنا عايزة القانون ياخد مجراه للآخر. المحامي قعد ورا مكتبه بكل ثقة: المحامي: وهو كذلك.. إحنا بكرا الصبح هنرفع قض*ية تبديد منقولات الزوجية، وهنطالب بنفقة متعة ونفقة صغار وأجر مسكن، ده غير المحضر اللي اتعمل النهاردة بإثبات الإكراه والتهديد، يعني من الآخر كده، مش هنسيبه يشم النفس، وهيجي يركع تحت رجليكي عشان تتنازلي عن القضايا دي عشان ميتحبسش. تاني يوم الصبح، أحمد صحي على كابوس جديد. تليفونه مكنش بيبطل رن من المحامين بتوعه، والكل بيقوله نفس الجملة: "موقفك القانوني صفر، وطليقتك معاها حوت أحوال شخصية هيوديك ورا الشمس لو مأخدتش خطوة لورا". أحمد قعد في الصالة راسه بين إيديه، وأمه وأخته قاعدين حواليه وشهم أصفر من الخوف بعد ما عرفوا إن الشقة اللي هما قاعدين فيها دي ممكن تتاخد منهم كتمكين مدرسة للأولاد. أخته بعياط: هنعمل إيه يا أحمد؟ أنا خايفة البت دي تحبسنا! دي شافت أيام سودة معانا ومظنش هترحم أولادنا. وفجأة، تليفون أحمد رن برقم غريب، رد بلهفة وصرخ: هو: ألو! أنتي فين؟ وعملتي كده إزاي؟ رديت عليه بكل برود وثقة، وصوتي كان بيهز كيانه: أنا: عملتها بقوة ربنا يا أحمد.. القوة اللي أنتي نسيتها وأنت بتذل فيا وبتخليني أبوس إيدك عشان أسمع صوت ولادي.. أديك شفت بنفسك مين اللي فينا دلوقتي مكسور ومش عارف ياخد حق ولا باطل. هو بصوت مخنوق ومكسور: هو: أنتي عايزة إيه يا بنت الناس؟ قولي شروطك عشان ننهي المهازل دي والمحاكم. ابتسمت ابتسامة انتصار هزت سماعات تليفونه وقلت له الجملة اللي هتخليه يندم طول عمره: أنا: شروطي؟ تؤ تؤ.. أنا مبقاش عندي شروط، أنا عندي أحكام قضائية هتتنفذ فوق رقبتك ورقبة أهلك.. والمرة دي، أعلى ما في خيلك اركبه! يا ترى أحمد هيوافق على كل التعويضات والقضايا ويمضي على شروط البطلة وهو مكسور؟ ولا هيحاول يعمل ملعوب جديد وينتقم منها؟ بعد المكالمة دي أحمد حس إن الدنيا ضلمت في وشه تمامًا، وعرف إن المرة دي مفيش مفر، الحوت اللي واقف مع طليقته مش هيرحمه، وأي خطوة غلط منه هتكون نهايتها السجن وضياع مستقبله بالكامل. مرت الأسابيع وأحمد كان بيتنقل من محكمة لمحكمة، وعمي رأفت شغال الله ينور، نزل عليه بالقضايا ورا بعض زي المطر؛ ق*ضية تبديد منقولات، ونفقة صغار، وأجر مسكن، والأهم من كل ده كان قرار تمكين من الشقة باعتباري حاضنة للأولاد. وفي يوم جلسة الحكم، كنت واقفة في المحكمة بكل فخر وثقة، لابسة أحسن ما عندي، وراسي مرفوعة للسما، وجنبي ولادي سانديني وباصين لي بفخر. على الناحية التانية كان واقف أحمد وأمه وأخته، وشهم أصفر، وعينيهم في الأرض من الخسارة والكسوف قدام الناس اللي كانت بتتفرج عليهم بعد ما سيرتهم بقت على كل لسان في المنطقة. القاضي نطق بالحكم العادل: تمكين الحاضنة من مسكن الزوجية، وإلزام الزوج بدفع كافة النفقات المتأخرة، مع حبسه سنة مع الشغل في قض/ية التبديد والابتزاز الإلكتروني وتزوير أوراق السفر تحت الإكراه، ما لم يتم التصالح. أحمد أول ما سمع الحكم، رجليه مأشلتوش، وقع على ركبه في وسط قاعة المحكمة، ودموعه نزلت من الخوف والكسرة. أمه وأخته جريوا عليا وهما بيعيطوا وبيصوتوا، وبيمسكوا في إيدي ويبوسوها قدام كل الواقفين: حماتي: أبوس إيدك يا بنتي.. سامحينا، إحنا ظلمناكي وافترينا عليكي، بلاش تحبسي ابني، ده ملهوش غيرنا، خدي الشقة وكل الفلوس بس بلاش السجن! أخته بعياط وندم: حقك علينا، إحنا اللي وزيناه عليكي، ارحمي ضعفنا وبلاش تخربي بيتنا! بصيت لهم ببرود تام، النظرة اللي كانوا بيبصوهالي وأنا بترجاهم أشوف ولادي، ووقفت بثبات وقلت لهم: أنا: أنا مش ظالمة زيكم، ولا هفرح في حبس أبو ولادي عشان منظرهم قدام الناس.. أنا هوافق على التصالح، بشرط واحد: الشقة تفضى النهاردة، وتكتب لي شيكات بمبلغ النفقة والمؤخر كله، وملمحش وش حد فيكم قريب من حياتي أنا وولادي تاني.. أحمد ملوش غير رؤية قانونية في النادي وبإشراف المحكمة.. موافقين؟ أحمد رفع رأسه وهو بيمسح دموع الذل ووافق فورا ومضى على كل الأوراق وهو مكسور ومش مصدق إنه نجا من السجن بأعجوبة، لكنه خسر كل حاجة؛ خسر بيته، وفلوسه، وكرامته، والأهم إنه خسر حب واحترام ولاده للأبد. تاني يوم، كنت واقفة في صالة شقتي، الشقة اللي حاولوا يطردوني منها ويزلوني فيها. كنت بفرشها من جديد بنظافة وهدوء، وولادي حواليا بيضحكوا ويلعبوا في أمان، مفيش خوف، مفيش إهانة، ومفيش حد يقدر يرفع عينه فيا. عمي رأفت زارني وبارك لي وهو بيقول بابتسامة: المحامي: مبروك يا بنتي، رجعتي هانم في بيتك، وكرامتك ورجعتلك ورجليكي فوق رقبة اللي ظلموكي بقوة القانون. أنا: الحمد لله يا عمي، ربنا ينصر كل مظلوم.. الدرس اللي اتعلمته إن الحق عايز قوة تحميه، والسكوت عن الإهانة عمره ما بيجيب سلام، بيجيب ذل أكتر. ومن اليوم ده، بدأت حياة جديدة، اشتغلت وكبرت وربيت ولادي أحسن تربية، وبقيت أنا الأمان والسند ليهم، وعشت هانم وراسي مرفوعة، وكل ما افتكر اللي فات أحمد ربنا إنه قوني ورجعلي حقي تالت ومتلت. **تمت بحمد الله** *الكاتب_أماني_سيد**
