الميراث كامله بقلم روماني مكرم
*”ابني حسن.. لو أنت بتقرأ الورقة دي، يبقى أنا قابلت وجه كريم، ويبقى إخواتك عملوا اللي كنت خايف منه ورموك بره الميراث. أنت الوحيد فيهم اللي اخترت تعيش بكرامتك وما طمعتش في فلوسي وأنا عايش، عزلت عشان تحمي نفسك وعيالك من جشعهم. أنا كنت عارف إن سامح وأحمد وسمر عينيهم على الميراث ومش هيسيبولك حاجة، عشان كده الفلوس اللي في البنك والعمارة والمصنع دول حقهم اللي هيفترسوا بعض عليه، أما حلالك وحقك الصافي فهو اللي بين إيديك ده.. الفلوس دي والدهب دول شقا عمري الحقيقي اللي شيلتهولك بعيد عن عينيهم، والدولاب ده أنا عملت فيه الدرج ده بإيدي من سنين عشان عارف إن محدش هيفكر ياخد العفش القديم غيرك. سامحني يا بني إن كنت قسيت عليك في يوم، بس كنت بختبر معدنك. خذ حقك وابني بيه مستقبلك ومستقبل عيالك، ولا تطأطئ رأسك لحد فيهم.”*
الدموع نزلت من عيني زي المطر، بس المرة دي ما كانتش دموع قهرة ولا إهانة.. كانت دموع راحة. أبويا ما ظالمنيش، أبويا كان عارفهم كويس وكان بيحميني منهم بطريقته. مراتي حضنتني وهي بتعيط وتقول: “ألف حمد وشكر ليك يا رب.. ربنا ما بيسبش مظلوم، حقك جالك لحد عندك يا حسن!”
قعدنا طول الليل نعد في الفلوس والدهب، المبلغ كان كفيل يشتري العمارة والمصنع بتوع إخواتي مرتين! بس أنا ما كنتش أفكر في الانتقام العمى، كنت بفكر إزاي أرد كرامتي اللي داوسوا عليها بالرمة وهم بيسلموني السرير والدولاب وبيضحكوا عليا.
عدى أسبوع كامل، وأنا قافل عليا بابي، ما بكلمش حد، وحطيت الفلوس والدهب في مكان أمين. وفي يوم الصبح، وأنا قاعد في شقتي، لقيت تليفوني بيرن.. كان رقم “أحمد” إخويا الصغير. رديت ببرود: “أيوة يا أحمد.”
صوته كان مهزوز وفيه خضة: “لحقني يا حسن.. إلحقنا يا خويا! سامح العمارة اتسحبت منه عشان كان بايع شقق فيها بعقود مزورة وأبويا ما كانش كاتبهاله، وسمر ضحك عليها جوزها وأخد الفلوس اللي في البنك وهرب، والمصنع وقف عشان البضائع محجوزة عليها في الجمرك وعاوزين مبلغ ضخم عشان تخرج! إحنا بنتخنق يا حسن والعيلة بتضيع!”
نزلت التليفون من على ودني وأنا ببتسم ابتسامة مكسورة. العاصفة بدأت بدري أوي، والفلوس الحرام اللي طمعوا فيها كانت السبب في خراب ديارهم.
وقفت قدام المراية، لبست أحسن لبس عندي، وربطت ساعتي، وقلت لمراتي: “أنا نازل يا أم إبراهيم.. رايح أرد الزيارة لإخواتي، وأشوف كرمهم اللي سيبوهولي في الدولاب هيعمل فيهم إيه!”
