اخت جوزي سرقتني ج 1

اخت جوزي فضحتنى في جروب العيلة قدام أكتر من 30 شخص، وقالتلي بكل بجاحة الغويشة الدهب اللي في إيدك دي بقالها سنين عندك مش جه الوقت ترجعيها؟ أنا بصيت لإيدي واتصدمت لأن الغويشة دي كانت أغلى قطعة دهب جابتهالي أمي في جهازي. لكن اللي حصل بعد كده خلّى كل العيلة تقف ضدي لحد ما قررت أجمعهم كلهم في بيتي، وأكشف لهم الحقيقة اللي محدش كان متوقعها. البداية ابن أخت جوزي قرب يتجوز، وقرايب العيلة في جروب الواتساب عمالين يبعتوا تهاني ومباركات ورا بعض. طنط جمالات يا صفاء، خلاص هتبقي حماة؟ ما شاء الله، ربنا يتمم بخير. الشقة جهزت خلاص؟ لو ناقصكم أي حاجة بس قولي في الجروب، وكلنا هنيجي نساعدك. أخت جوزي بعتت إيموجي بيعيط بحرقة تسلموا لي يا جماعة على سؤالكم. الشقة الحمد لله اشتريناها، بس أهل العروسة طالبين شبكة 100 جرام دهب! الغلو ده فوق طاقتي، بجد مش قادرة أشتري كل ده. عمتو نادية بتصبرها ما تقلقيش يا حبيبتي، جواز الأولاد خطوة كبيرة، وكلنا مع بعض هنفكر في حل. منى بنت عمهم الكبيرة لو كدة اتكلمي مع أهل العروسة تاني، واطلبي منهم ينزلوا في الطلبات شوية. ما تعمليش في نفسك كدة وتتعبي صحتك. وفى اللحظة اللى جايه أكتب كلمتين أهون بيهم عليها، لقيت أخت جوزي فجأة عملت لي منشن في الجروب وكتبت يا مرات أخويا، الغويشة الدهب دي بقالها كذا سنة في إيدك، مش جه الوقت بقى ترجعيها لي؟ أنا اتصدمت في مكاني ومبقتش عارفة أرد. بصيت على إيدي وعلى الغويشة الدهب اللي وزنها 50 جرام في ايدى. بس دي شبكتي ودهبي اللي أمي جابتهولي في جهازي! الجروب كله سكت فجأة، ومحدش بقا يتكلم. رسالة أخت جوزي كانت ظاهرة وواضحة بشكل يستفز. صوابعي وقفت فوق الشاشة بتاع خمس ثواني كاملين، قبل ما أكتب وأسألها صفاء، إنتِ بتتكلمي عن أنهي غويشة بالظبط؟ أخت جوزي ردت عليا علطول يا رانيا، هتعملي نفسك مش فاهمة؟ بتكلم عن الغويشة اللي في إيدك دي طبعاً. الغويشة دي كانت من ضمن دهب جهاز الصالون اللي أمي اشترتهولي قبل الفرح. كانت مشغولة يدوي على الطراز القديم، واتشرت في وقت كان الدهب فيه في أعلى أسعاره. يوم فرحي، مفيش حد من قرايب جوزي ما أبدش إعجابه بيها ويحسدني عليها. حتى حماتي وقتها كانت ضحكتها من الودن للودن وقالت رانيا محظوظة بجد. الغويشة دي تمنها يجيب عربية، حماتي العزيزة مكرمة بنتها بجد. ودلوقتي، أخت جوزي تفتح بقها وبكل بساطة تقول إنها بتاعتها؟! يا صفاء، يمكن الذاكرة خانتك؟ الغويشة اللي لَبساها دي أمي اللي شرياها ليا، مش بتاعتك خالص. أخت جوزي بعتت إيموجي مصدوم رانيا! إنتِ بتقولي إيه? وقتها كنا متفقين بوضوح إني مسلِّفاها ليكي تلبسيها عشان تظهري بيها قدام الناس وتاخدي لقطة، ولما ابني يتجوز ترجعيها. جرى إيه؟ عشان سبتها معاكي سنين ومطلبتهاش، افتكرتيها بقت ملكك بجد؟ بعد ما الرسالة دي اتبعثت، القرايب اللي كانوا ساكتين بدؤوا يتدخلوا ويتكلموا كلهم مرة واحدة. بس اللى حصل بعد كده خلاها تندم . طنط جمالات هو الموضوع كدة؟ دا إنتِ لبساها من سنين وإحنا فاكرينها بتاعتك يا رانيا. يا بنتي كدة غلط، الأمانة لازم تترد لأصحابها. عمتو نادية يا رانيا، أخت جوزك بتجوز ابنها بالعافية والموضوع مش سهل عليها. الغويشة دي المفروض ترجعيها لها فعلاً. منى فعلاً، هي لما سلفتهالك زمان كان نيتها خير وعشان شكلك، ما ينفعش تطمعي فيها وتاخديها لنفسك. أنا قاعدة باصة للشاشة ومش مصدقة. الناس دي كلها من غير ما تسأل ولا تفهم أصل الحكاية، حكموا عليا علطول إني طماعة وباكل حق الناس ومستولية على حاجة مش بتاعتي. بتقول إني مستلفاها منها؟ لما أمي اشترت الغويشة دي، كانت مصورة فيديو تذكاري في محل الصاغة، والفواتير وشهادة ضمان الدهب كلها معايا وتحت إيدي. وهي طالعة بكل ثقة تقول بتاعتها؟ رديت في الجروب ومبقتش هاممني حد بما إنكم كلكم بتقولوا إن الغويشة بتاعتها، معاها أي دليل يثبت كلامها؟ أخت جوزي لما لقت نفسها معندهاش أي دليل، بدأت تبعت رسايل صوتية. وفي كل ريكورد كانت بتعيط وتندب حظها وتبين نفسها مظلومة ومكسورة أنا معنديش غير أخ واحد، ومن صغري وأنا بضحي وبشيل من نفسي عشانه. بس الغويشة دي كنت شايلاها لجواز ابني. أبويا وأمي كانوا بيقولوا لي استني وهي هترجعها من نفسها. أنا استحملت وسكت السنين دي كلها، بس شقة الواد دمرت كل شقا عمري وجمعت لها القرش على القرش، ودلوقتي بجد مفيش معايا مليم. ميعاد قراية الفاتحة والشبكة قرب، وأهل العروسة بيستعجلوني كل يوم، وأنا عمالة أجِّل وأماطل. يا مرات أخويا، أنا ياما وقفت جنبك وساعدتك زمان، ودلوقتي عايزة تلوى دراعي وتموتيني بحسرتي؟ القرايب لما سمعوا كلامها ورسايلها، قفشوا فيا وبدؤوا يهاجموني أكتر عشان يدافعوا عنها. طنط جمالات يا رانيا، أخت جوزك جابت آخرها واتكلمت بكسرة نفس، خلاص بقى رجعي لها حاجتها وماتعمليش مشاكل وسط العيلة. عمتو نادية أيوة فعلاً. إحنا عارفينك عاقلة وتفهمي الأصول، بلاش عشان حتة دهب تخسري أهلك وتعملي شوشرة. 02 حتى عمو محمود اللي طول عمره ساكت ومش بيتدخل في حاجة، كتب يا رانيا، صفاء وقفت جنب طارق كتير السنين اللي فاتت. ما ينفعش يا بنتي تاكلي حقها بالطريقة دي. الكل بقا يلومني ويشاور عليا، ومحدش فيهم كلف نفسه يسألني إيه الحقيقة من وجهة نظري. طنشت كلامهم وهجومهم، ودخلت وجهت كلامي لأخت جوزي مباشرة يا صفاء، إنتِ بتقولي إن الغويشة دي بتاعتك، معاكي فاتورة ليها؟ ردت عليا بكل ثقة وعين قوية فاتورة إيه اللي هكون شايلاها من سنين؟ مين بيشيل الفواتير كل ده؟ طب تمام، الفلوس اللي اتدفعت فيها، مين اللي دفعها؟ ردت بنبرة فيها زهق وقلة صبر أنا طبعاً، هيكون مين يعني؟ ماشي، طالما إنتِ اللي شرياها، أكيد فاكرة اشتريتيها تاريخ كام؟ ومن أنهي محل صاغة؟ وكان سعر الجرام كام وقتها؟ قعدت فترة طويلة جداً مش بتكتب ولا بترد. وبعد شوية بعتت تقول بقالها سنين طويلة يا رانيا! مين هيفتكر التفاصيل دي كلها? ما تمسكيش في الحاجات دي عشان تنكري الحقيقة وتتهربي. يا مرات أخويا، إحنا أهل، وأنا زمان مأخذتش عليكِ وصل أمانة ولا ورقة تثبت إني سلفتهالك، بس هل دا معناه إنك تاكلي عليا حاجتي بجد؟ الجملة دي كانت زي المسمار اللي ثبتوني بيه في خانة اللي بتاكل الأمانة. هي اللي معندهاش أي إثبات ولا دليل، وفي الآخر أنا اللي طلعت طماعة وبخطط للاستيلاء عليها من زمان! بين السطور كانت بتلمح للكل إني نيتي وحشة. لسه هرد وأجيب آخري معاها، لقيت حماتي بتتصل عليا. فتحت الخط لقيتها بتقول جرى إيه يا رانيا؟ إيه اللي بيحصل في الجروب دا؟ إزاي تقفي قصاد أخت جوزك وتكلميها بالشكل دا؟ حسيت بنار قايدة في صدري يا ماما، أنا مش بتخانق معاها. صفاء طالعة تتبلى عليا وعايزة تاخد دهبي وبتقول إنه بتاعها، ولما طلبت منها تتكلم بكلام منطقي ودليل، بقيت أنا اللي غلطانة؟ حماتي تنهدت بقلة حيلة وقالت يا بنتي أختك برضه معذورة ومزنوقة زنقة كِلاب ومش لاقية حل. ومش لاقية حل تخليها تتبلى على الناس وتتهمهم بالباطل؟ ما تقولنيش كلام مقولتوش. بس يوم فرحك، إنتِ فعلاً كنتِ لابسة غويشة دهب ثقيلة. كنت هضحك من كتر السخرية يا ماما، كلامك دا يضحك بجد. يعني عشان أنا لبست غويشة دهب يوم فرحي، تبقى بتاعتها؟ طب ما أنا كنت لابسة كوليه وخاتم دهب كمان، يطلعوا بتوعها هما كمان بالمرة؟ الناحية التانية سكتت خالص. وبعد كام ثانية، غيرت نبرة كلامها وقالت يا رانيا، ما تبقيش ناشفة كدة. إنتِ اتجوزتي طارق، والغويشة الدهب دي بقت من ضمن مالكم وحاجتكم سوا. لا يا ماما، الغويشة دي أمي اللي جابهالي في جهازي، يعني ملكي أنا لوحدي ومن قبل الجواز. لا هي ملك طارق، ولا هي ملك صفاء. ما تبقيش قاسية وجاحدة كدة! حماتي صوتها علي فجأة أختك لسه دافعة دم قلبها في شقة الواد، ومعهاش السيولة الكافية. خدي الغويشة اديها لها تمشي بيها حالها في الأيام الصعبة دي. وبعد ما تمشي حالها؟ الخط من ناحية حماتي مطلعش منه نفس. كملت كلامي