جوزي رمي عليا القهوة ج 1

في نفس الوقت ده، كان كريم راجع مع دنيا للبيت، وكل واحد فيهم كان بيقول كلام زي بعضه هتجيلها راجعة تعتذر، وتديك الفلوس من غير ما تتكلم. كانوا متأكدين إني ضعيفة، إني ما أقدرش أعيش من غيره، إني كل اللي هعمله هو أبكي وأرجع أترجاه يرضى عليا. أول ما فتح الباب لقى البيت هادي ومظلم، وصوت ما كانش طالع من أي حتة. نادى بصوت عالي سلمى.. يا سلمى فينك؟ إلعبيها خلاص وكفاية دراما. وما لقاش رد. مشي جوا شوية ولقى الشنطة اللي كانت بتاعتي مش موجودة، وبعدين شاف الدبلة على الترابيزة جنب بقايا

القهوة المتناثرة والزجاج المكسور.

وقف مذهول لدقائق، وما قدرش يتكلم.. دنيا جت وراه وشافت الدبلة، فقالت بقلق مكنتش عارفة تخبيه إيه ده؟ هي راحت فين؟ مش معقولة راحت كده من غير رجعة!. كريم ضحك ضحكة عالية مليانة غرور وثقة زيادة، وقال تروح فين يعني؟ هتروح لحد مين؟ مش معاها فلوس، ولا معاها حد يساعدها.. ساعة وتلاقيها جاية راجعة تبكي تحت رجليا. لكن جواه كان قلق بيدق، لأنه أول مرة يشوفها كده.. أول مرة ما تردش عليه، أول مرة تسيب البيت من غير ما تقول كلمة ولا تترجاه.

دنيا كانت أقل ثقة منه، قالت وهي بتدور في كل حتة أخي أنا خايفة.. هي كانت شكلها غريب لما خرجت، ما بكتش ولا صرخت.. كأنها كانت مستعدة لكل ده. كريم زعق فيها وقال اسكتي يا بت! ما تخوفيش روحي.. هي تعبانة شوية وهترجع، ولما ترجع هعلمها الأدب من أول وجديد. وبينما هو بيتكلم، جاله تليفون من البنك.. الموظف كان بيتكلم بصوت رسمي جداً وقال أستاذ كريم، نأسف لكن الحساب اللي كنت بتتعامل معاه باسم السيدة سلمى محمد مغلق تماماً، ولا يوجد لدينا أي صلاحية لفتحه أو تنفيذ أي تعليمات من غير حضور صاحبة الحساب شخصياً وموافقتها الرسمية.

كريم ضحك وقال إيه الكلام الفاضي ده؟ أنا جوزها، وعندي توكيل رسمي منها أتصرف في كل أمورها. الموظف رد بهدوء التوكيل ده ألغي من يومين، وتم إبلاغنا بذلك من المحامية الخاصة للسيدة، وأيضاً تم تجميد كل الحسابات والاستثمارات الخاصة بها لحين انتهاء الإجراءات القانونية. سكت كريم ومش عارف يقول إيه، وحس إن الأرض بتتحرك من تحت رجلينه.. كان فاكر التوكيل ده حاجة مضمونة، حاجة تخلّيه يتحكم في كل حاجة ليها، وما كانش يعرف إنها كانت مستعدة لكل خطوة بيخطيها.