بعد ما خلصت اجراءات الطلاق1
روماني مكرم
صرخت:
—هترجعي الـ27 موظف شغلهم حالًا!
ياسمين وقفت عند الباب.
—اتفضلي امشي من بيتي.
—دول ناس عندهم بيوت! عندهم عيال عايشة من المرتبات دي!
ردت ياسمين:
—وأبويا عنده عيلة برضه. وإنتوا بقالكم 6 سنين بتسرقوه.
سهير اتجمدت.
ثانية واحدة بس.
لكن ياسمين شافت الخوف في عينيها.
قالت:
—إنتِ مش عارفة إنتِ بتقولي إيه.
ردت ياسمين:
—عارفة إن شركة النيل كانت بتاخد فلوس مقابل مخزن مش موجود. وعارفة إن مروان وافق على أكتر من 300 فاتورة مزورة. وعارفة إن الفلوس في الآخر كانت بتوصل لحسابات ليها علاقة بيكي.
سهير وطت صوتها فجأة.
—شريف لسه بيحبك. إحنا ممكن نحل كل ده. ارجعي لجوزك، رجعي الناس شغلهم… وننسى أخطاء الماضي.
ياسمين كانت هتضحك.
من ثواني الست دي كانت بتهددها.
ودلوقتي بتحاول تلعب دور الأم الحنينة.
قالت:
—طلاقي نهائي.
وسكتت لحظة.
—وقرار فصلهم نهائي برضه.
صرخت سهير:
—هدمرك في المحاكم!
ردت ياسمين بهدوء:
—اعمليها.
سهير سكتت.
ياسمين كملت:
—لأن أول ما ترفعي قضية، تقرير المحاسبة الجنائية هيبقى ضمن أوراق القضية… وساعتها الجهات المختصة ممكن تراجعه كله.
وش سهير فقد لونه.
قالت:
—إنتِ مش عندك الجرأة تفضحي عيلة جوزك السابق وتبلغي عنهم.
ياسمين بصتلها بثبات.
—إنتِ عمرك ما اعتبرتيني من عيلتك أصلًا.
وقفلت الباب في وشها.
لكن اللي ياسمين ما كانتش تعرفه…
إن بعد أقل من ساعة من خروج سهير من عندها، أبوها هيتصل بيها ويقول لها إن الأمن لقى واحد من الـ27 موظف لسه مستخبي جوه الشركة.
وإنه ماكانش بيحاول يسرق ملفات.
كان بيحاول يوصل لخزنة قديمة في مكتب الحاج محمود.
ولما الأمن فتح الشنطة اللي معاه…
لقوا جواها عقود ملكية وأسهم أصلية باسم شخص واحد.
شريف… جوز ياسمين السابق.
والتاريخ المكتوب على العقود كان قبل جوازهم بسنين.
الصدمة لجمت لسان ياسمين. الكرتونة اللي كانت شايلاها وقعت من إيدها، والكتب والأوراق اتطوحت على أرض الشقة الجديدة.
سألت أبوها بصوت مبحوح:
—يعني إيه يا بابا؟ عقود إيه وأسهم إيه اللي باسم شريف ومن قبل ما نتجوز؟ الشركة دي إنت بانيها عرق فوق عرق من سنة 87!
