صدمه فرحي حكايات إسراء هاشم١
مبروك يا عروسة بس يا ريت تسألي عريسك الغالي عن تحاليل الـ HIV اللي عملها من شهر جوزك عنده الإيدز، والفرح اللي إنتي فرحانة بيه دة.. جنازة موتك!” دة كان صوت هدير بنت خالة طارق
حسيت إن الهوا اتقطع عن القاعة.. النور الأبيض اتقلب لضلمة، والزغاريط بقت في وداني زي صراخ ناس بتتحرق. بصيت لطارق.. كان بيضحك من قلبه وصاحبه بيشيله على الكتاف. الضحكة اللي كنت بموت فيها، فجأة بقيت شيفاها ضحكة شيطان! رجلي اتمسمرت في الأرض، وحسيت بشلل حقيقي.. الدم هرب من عروقي.
”نادين! إنتي كويسة؟!”.. طارق قرب مني ومسك إيدي.. لمسته كهرّبتني، سحبت إيدي بسرعة ورعب ودموعي نزلت.
”تعبانة.. طارق أنا دايخة، مش قادرة أكمل الفرح، روحني حالا!” وفجاة وقعت من طولي من الصدمه
الفرح باظ، والكل اتقهر لأن العروسة “أُغمى عليها” من التعب. وصلنا الشقة.. قفلنا الباب وبقينا لوحدنا. الخوف كان بياكل في قلبي.. لو الكلام ده صح، لمسة واحدة منه كفيلة تنهي حياتي.
طارق قرب مني بحنان وهو بيفكلي الطرحة: “سلامتك يا روحي، ألف سلامة عليكي.. عين وحسد والله.”
أنا كنت بتنفض.. بعدت عنه خطوة وقولت بصوت مهزوز: “طارق.. أنا تعبانة جداً، حاسة إني بموت.. أرجوك سيبني النهاردة، مش قادرة.”
ملامحه اتغيرت.. الشك بدأ يظهر في عينه: “نادين.. في إيه؟ إنتي من وقت ما كنا في القاعة وإنتي بتبعدي عني.. هو في حاجة؟”
هربت منه ودخلت الحمام وقفت ورا الباب وأنا بنهج.. قعدت على الأرض أعيط وأنا كاتمة صوتي. أنا عايشة مع قنبلة موقوتة. لازم أتحرك، لازم أعرف الحقيقة من غير ما أحسسه، عشان لو طلع مظلوم مأخربش بيتي، ولو طلع مجرم.. ألحق نفسي!
تاني يوم الصبح.. طارق نزل يشتري فطار. كانت دي فرصتي.
جربت أفتح تليفونه.. الباسورد كان تاريخ ميلادي، فتح! دخلت على الرسايل، الواتساب، الإيميلات.. مفيش أي حاجة غريبة. مفيش ستات، مفيش رسايل مشبوهة.
دخلت على الأوضة التانية اللي فيها مكتبه وورقه الخاص. بدأت أنكش زي المجنونة.. فتحت درج مقفول بعد ما كسرت قفله . لقيت ملف مقفول مكتوب عليه “تحاليل معمل البرج – سري”.
قلبي كان هيقف.. فتحت الورقة وأنا إيدي بتترعش.. لقيت تحليل دم.. وبصيت على النتيجة.. كانت Positive (إيجابي) لمرض نقص المناعة المكتسبة (الإيدز)! والتاريخ؟ من شهرين فاتوا! يعني قبل الفرح بـ 60 يوم! هو عارف.. عارف ورغم كدا ضحي بيا
